Málsligir spurningar um adressur

Jónas Broncksgøta ella Jónas Broncks gøta? Mariugøta ella Mariu gøta?

Tað rætta er Jónas Broncks gøta og Mariugøta.

Tá ið gøtunøvn innihalda eitt fólkanavn, er reglan, at navnið og gøta verða skrivað saman, tá ið fólkanavnið er eitt einstakt navn, t.d. Maria + gøta = Mariugøta, men tá ið fólkanavnið er fleiri nøvn, vanliga fornavn og eftirnavn, verður gøta skrivað leyst frá hinum nøvnunum, t.d. Jónas Bronck + gøta = Jónas Broncks gøta.

Kelda: Málstovan - Marius Staksberg

Eitir tað Ovarivegur, Ovari vegur, ovari Vegur ella Ovari Vegur?

Tað eigur at vera Ovarivegur. Lýsingarorð + navnorð, verða tey skrivað í einum: Lítlavatn, Stóravatn, Heimaralíð, Ytralíð, Eystaravág, Norðastahorn, Hægstafjall, Niðarivegur, tó við hesum undantøkum:

a) Lítla Dímun, Stóra Dímun

b) Um seinni liður er samansett navn: Heimara Hálsavatn, Norðasti Grønutangi.

Kelda: Staðarnavnanevndin

Tað rætta er Á Heyggi og Í Brekkuni.
Tá talan er um eitt navn á einum skelti ella korti, eigur tað at byrja við stórum. Um skrivað verður: Eg búgvi á Heyggi ella í Brekkuni, skal tað vera við lítlum.

Kelda: Eivind Weyhe, lektari í málfrøði

Her ber til at síggja ein lista við bygdum og býum í hvørjumfalli og hvussu fyrisetingar verða brúktar [hygg her]

Broytingar í nøvnum sambært Staðarnavnanevndini

Kelda: Staðarnavnanevndin

Heildarhvørsfall (gruppegenitiv) í veganøvnum

Heildarhvørsfall nevnist tað málsliga fyribrigdið at hvørsfalsending, sum viðvíkur einari navnheild av fleiri orðum, bara verður skoytt uppí tað seinasta orðið í navnheildini, t.d. Djóna í Geils gøta, har s’ið í Geils hoyrir til alla navnheildina “Djóna í Geil” og ikki bara “Geil”.

 
Í veganøvnum sum hava bæði fornavn og eftirnavn (t.d. Jákup Dahl) sum forlið, fær fornavnið hvønnfalsform, og eftirnavnið fær hvørsfalsending, t.d. Jákup Dahls gøta, Jákup Nolsøes gøta, Fríðrik Petersens gøta, Jóannes Paturssonar gøta, Grím Kambans gøta, Jógvan Waagsteins gøta.

Eru fornøvn stytt (t.d. J.C. Svabo), verður hvørsfalsending sett aftrat eftirnavninum, t.d. J.C. Svabos gøta, V.U. Hammershaimbs gøta, R.C. Effersøes gøta.

Kelda: Staðarnavnanevndin